Retorn  



La pagina « Mesclum » dau jornau « La Marseillaise » pareis cada dijòus dempuei 1985. Se i tròban d’articles de fons, de renduts còmptes e de fotòs, de novèlas e de romans fulhetons, de dessenhs, de BD e, regularament, d’informacions variadas sus la vida culturala, politica, economica en Occitània. Una experiéncia unica fins a la parucion de « La Setmana », ebdomadari politico-culturau occitanista mai classicament jornalistic.
Es 9 ans puei, en 1994, que s’es creada l’associacion « Leis Amics de Mesclum », la publicacion semaniera, òbra d’un militant, es ansin venguda projècte collectiu. La tòca premiera de l’associacion, fondamentalament antí-racista, es la lucha per l’egalitat vertadiera deis òmes, que passa per l’egalitat dei culturas, subretot aquelei, coma l’occitana, que son minorizadas, despresadas, coma se la valor d’una cultura se podiá mesurar en nombres, çò qu’es malastrosament un vejaire colonialista fòrça comun…

Demandam ges de privilègi per tant per leis òmes
que per quina lenga e quina cultura que sia,
solament la paritat
es aquò la democracia e l'egalitat vertadiera


L’activitat es pron larga :
  • Participacion a la redaccion de la pagina « Mesclum »,
  • Cors d’occitan provençau,
  • Conferéncias,
  • Debats,
  • Fèsta annala a la rintrada de setembre,
  • Manifestacions divèrsas, dont :
    • Collaboracion au concors « Enfance – Jeunesse », de creacion culturala multiforma, de « La Marseillaise », dubèrt ais enfants de la mairala a la tresena,
    • Organizacion dau concors « Escriure en lenga d’Òc ».
  • Publicacions :
    • Armanac de Mesclum que pareis cada annada despuei 1995 conten una seleccion de tèxtes e d’illustracions dei sòcis e collaborators de l’associacion, fòrça utils per l’ensenhament,
    • Leis actes dau collòqui internacionau sus « Leis escrivans marselhés » (redigits essencialament en francés) que l’associacion a organizat au mes de mai de 2000, son totjorn disponibles,
    • Leis actes dau collòqui « Jòrgi Reboul » (redigits en occitan e en francés e ambé fòrça illustracions) que l’associacion a organizat lo 9 d’abrieu de 1994, son elei tanben totjorn disponibles.



« Leis Amics de Mesclum » collabòran a l’activitat de :


     L'OSTAU DAU PAÍS MARSELHÉS
     L'INSTITUT D'ESTUDIS OCCITANS
Naut de Pagina